الشعب يقاسي في البطالة والفقر وحدو واحزاب التجمع شابعة في فلوس البلاد .

اليوم نلقى حزب الوفاق الجمهوري عامل مؤتمر في قصر المؤتمرات في تونس . إلي قعدت باهت فيه هو إنو رغم إنو حزب جديد لكن إمكانياتو المالية كبيرة برشة (مستدعي بلطي وناس بم بم)  ما تتناسبش مع حجمو وتاريخو لأن حزب ينشط منذ أشهر  .  هو مهوش الحزب الوحيد إلي إمكانياتو ما  تناسبش حجمو  لكن كيف نجيو نشوفو نلقاو إلي الاحزاب المنبثقة عن التجمع كلها عندها تسهيلات وإمكانيات كبيرة برشة .

إلي زاد على ما بيا إنو سمعت  إلي الدولة قاعدة تمول فيهم من الخزينة.  كل واحد 300 ألف دينار . بربي زعمة هل فلوس إلي مشات وباش تمشي للاحزاب كتمويل مش كان الشعب أولى بها؟  احزاب  شطر مؤسسيها أولاد تجمع وكلاب بن علي تصبح تتكلم بإسم الثورة وبإسم إلحرية  وتعمل في الندوات والمؤتمرات والاجتماعات في أرقى وأغلى النزل والناس مش لقي تاكل . زعمة شكون أولى  و أحق؟ المرأة إلي عايشة في كوخ في عين دراهم وحلمها الوحيد إنو اولادها  يقراو  ولا حزب أفاق تونس إلي تحكم فيه مدام شرشور حشيشة نسيبة بن علي و حليفة   أمريكا ولا حزب كامل مرجان ولا حزب عمك جغام ولا ولا ولا ...حتى هما 30 حزب كلهم متفرعين عل تجمع .احنا نحبو نلغو المديونية والحكومة تفرق في فلوس البلاد على احزاب الهانة !!! بربي زعمة كان تم استثمارهم  في حاجة تصلح ولا مشروع تنموي كبير في جهة من الجهات مش خير ؟؟ لكن لا ، لازم البلاد تفلس واقتصادها معادش تقوملو  قايمة  ملة وينك انتي !!! لازم البلاد تغطس في المديونية والقروض ونخرجو احنا بيدينا على روسنا ...هذا إذا خلطنا نقعدو حيين ....